Өрел ауылында «Спорт сүйгіш отбасы- әкем, анам және мен» ұранымен спорттық салауатты өмір салты күні өтті. Іс-шара «Қонақжай отбасы» жобасы аясында ұйымдастырылып, отбасылық құндылықтарды нығайтуға, салауатты өмір салтын насихаттауға және балалар мен ата-аналар арасындағы сенімді қарым-қатынасты дамытуға бағытталды.

Мерекеге 14 қонақжай отбасы мен 41 жобаға қатысушы қатысты. Спорт алаңында отбасылар көңілді эстафеталар, командалық жарыстар мен ашық ойындарда күш сынасты. Балалар мен ата-аналар ептілік, төзімділік, ұйымшылдық және командалық жұмыс дағдыларын көрсетіп, белсенділік танытты.

Жарыс жылы, әрі достық атмосферада өтті. Бәсекелестікке қарамастан, іс-шараның басты мақсаты – жеңіске жету емес, ашық ауада бірлесіп уақыт өткізу мен отбасылық қарым-қатынасты нығайту болды.

Шара соңында барлық қатысушыларға естелік дипломдар мен тәтті сыйлықтар табыс етілді. Мұндай іс-шаралар ауылдағы әлеуметтік байланыстарды нығайтып, қоғамдағы салауатты өмір салтын қалыптастыруға зор үлес қосады.